اسرائیل کا دعویٰ ایران کے اہم کمانڈر غلام رضا سلیمانی حملے میں شہید

 

پاسدارانِ انقلاب کی بسیج فورس کو بڑا دھچکا قرار، ایران کی جانب سے تاحال خاموشی

جستجو نیوز
منگل 17 مارچ 2026

تل ابیب
اسرائیل کی فوج نے دعویٰ کیا ہے کہ اس نے ایران کی پاسدارانِ انقلاب کی بسیج فورس کے اہم کمانڈر غلام رضا سلیمانی کو ایک ٹارگٹڈ کارروائی میں ہلاک کر دیا ہے۔

اسرائیلی فوج کے جاری کردہ بیان کے مطابق یہ کارروائی گزشتہ رات عمل میں لائی گئی، جس میں سلیمانی کو براہِ راست نشانہ بنایا گیا۔ بیان میں کہا گیا ہے کہ یہ ہلاکت ایران کے کمانڈ اینڈ کنٹرول ڈھانچے کے لیے ایک نمایاں دھچکا ثابت ہوگی۔

فوجی حکام کا مزید کہنا ہے کہ ایرانی کمانڈرز کے خلاف کارروائیاں جاری رہیں گی اور کسی بھی ممکنہ خطرے کے پیشِ نظر مزید اقدامات سے گریز نہیں کیا جائے گا۔

دوسری جانب ایران کی طرف سے اس دعوے پر ابھی تک کوئی باضابطہ ردعمل سامنے نہیں آیا، جس کے باعث صورتحال میں غیر یقینی برقرار ہے۔

علاقائی تجزیہ کاروں کے مطابق اگر اس دعوے کی تصدیق ہوتی ہے تو یہ پیش رفت مشرق وسطیٰ میں کشیدگی میں مزید اضافے کا سبب بن سکتی ہے، جبکہ دونوں ممالک کے درمیان پہلے سے موجود تناؤ ایک نئے مرحلے میں داخل ہو سکتا ہے۔