میسی اور انٹر میامی کھلاڑیوں کی ٹرمپ سے ملاقات پر تنقید، ایران میں حملوں کے بیان پر تالیاں

 

 

فٹ بال اسٹارز کی وائٹ ہاؤس میں امریکی صدر کے موقف پر ردعمل متنازع، سوشل میڈیا صارفین نے انسانی نقصان پر سوالات اٹھا دیے

ہفتہ 7 مارچ 2026
رپورٹ جستجو نیوز

ارجنٹائن کے فٹ بال اسٹار لیونل میسی اور ان کے کلب انٹر میامی کے کھلاڑیوں نے حال ہی میں امریکی صدر ڈونلڈ ٹرمپ سے وائٹ ہاؤس میں ملاقات کی، جس کا مقصد ان کے کلب کی دسمبر میں امریکا کی سب سے بڑی فٹ بال لیگ میجر لیگ ساکر میں پہلی بار چیمپئن بننے پر مبارکباد دینا تھا۔

ملاقات واشنگٹن میں ڈی سی یونائیٹڈ کے خلاف ہونے والے ایم ایل ایس میچ سے قبل ہوئی۔ اس موقع پر صدر ٹرمپ نے میڈیا کے سامنے کامیابی کا جشن مناتے ہوئے ایران میں جاری امریکی اور اسرائیلی فوجی کارروائیوں کا حوالہ دیا۔ انہوں نے حالیہ بمباری اور اس میں سینکڑوں بچوں کی شہادت کے بارے میں معلومات بھی فراہم کیں۔

لیونل میسی، لوئس سواریز اور ان کے ساتھی کھلاڑیوں نے صدر ٹرمپ کی تقریر کے دوران تالیاں بجائیں، جسے فٹ بال کے شائقین اور سوشل میڈیا صارفین نے انتہائی متنازع اور غیر معمولی ردعمل قرار دیا۔

سوشل میڈیا پر صارفین نے ایران میں شہید ہونے والی معصوم اسکول کی طالبات کی ویڈیوز شیئر کرتے ہوئے سوال اٹھایا کہ ان بچوں کی ہلاکت پر تالیاں کیوں بجائی جا رہی ہیں، اور کھلاڑیوں کے اس اقدام پر شدید تنقید کی۔

ماہرین اور ناظرین کے مطابق کھیل کی دنیا اور عالمی سیاست کے حساس مسائل کو ایک ساتھ جوڑ کر اس طرح کا ردعمل عوامی جذبات کے لیے ناپسندیدہ ثابت ہو سکتا ہے، اور انسانی جانوں کے نقصان پر غیر سنجیدہ رویہ عالمی سطح پر فٹ بال برادری کی ساکھ کے لیے چیلنج بن سکتا ہے۔