رہبرِ معظم، شہیدِ راہِ حق، محافظِ قدس حضرت آیت اللہ سید علی حسین خامنہ ایؒ کی نمازِ جنازہ اور تدفین مؤخر

 

عوامی شرکت اور انتظامی تکمیل کو یقینی بنانے کے لیے شیڈول میں تبدیلی، نئی تاریخ کا اعلان

 جلد متوقع

بدھ، 4 مارچ 2026 — جستجو نیوز

تہران  اسرائیلی حملے میں شہید ہونے والے رہبرِ معظم، شہیدِ راہِ حق، محافظِ قدس  سید علی حسین خامنہ ای  کی نمازِ جنازہ اور تدفین ایک بار پھر ملتوی کر دی گئی ہے۔ آج منعقد ہونے والا مرکزی اجتماع عوامی شرکت اور انتظامی تیاریوں کو مدنظر رکھتے ہوئے مؤخر کیا گیا۔

قبل ازیں اعلان کیا گیا تھا کہ نمازِ جنازہ کے بعد تہران میں واقع امام خمینی نماز ہال میں تین روزہ الوداعی تقریب منعقد ہوگی، جہاں عقیدت مند اپنے محبوب رہبر کو خراجِ عقیدت پیش کرتے۔ تاہم تازہ فیصلے کے تحت اس تقریب کو بھی عارضی طور پر روک دیا گیا ہے۔

ذرائع کے مطابق تدفین کے لیے مشہد کا انتخاب کیا گیا تھا، مگر حتمی تاریخ اور وقت تاحال طے نہیں ہو سکا۔ حکام کا کہنا ہے کہ مقام، سیکیورٹی انتظامات اور عوامی سہولیات کو مکمل ہم آہنگی کے ساتھ حتمی شکل دینے کے بعد نیا شیڈول جاری کیا جائے گا۔

ایرانی میڈیا رپورٹس کے مطابق مختلف صوبوں سے آنے والے قافلوں اور عوامی آرا کو مدنظر رکھتے ہوئے وقت میں تبدیلی کی گئی، تاکہ زیادہ سے زیادہ شہری اس تاریخی نمازِ جنازہ میں شرکت کر سکیں۔ محدود سفری سہولیات کے باعث متعدد افراد کو تاخیر کا سامنا ہے۔

ملک بھر میں سوگ اور عقیدت کی کیفیت برقرار ہے۔ لاکھوں دل اپنے شہیدِ راہِ حق رہبر کو آخری سلام پیش کرنے کے منتظر ہیں، جبکہ نئی تاریخ کے باضابطہ اعلان کا شدت سے انتظار کیا جا رہا ہے۔