ایران امریکا مذاکرات پر علما کی نیک خواہشات، کامیابی کو عالم اسلام کے مفاد سے جوڑ دیا گیا

 

ایران امریکا مذاکرات پر علما کی نیک خواہشات، کامیابی کو عالم اسلام کے مفاد سے جوڑ دیا گیا
پاکستان کی میزبانی میں جاری سفارتی کوششوں کو اہم پیش رفت قرار، دعا اور امید کا اظہار

ہفتہ 11 اپریل 2026
رپورٹ جستجو نیوز

اسلام آباد
پاکستان کی میزبانی میں جاری امریکا اور ایران کے درمیان اعلیٰ سطحی مذاکرات پر ملک کے جید علمائے کرام نے نیک خواہشات کا اظہار کرتے ہوئے اس عمل کی کامیابی کو نہ صرف خطے بلکہ پوری دنیا کے لیے اہم قرار دیا ہے۔

ممتاز عالم دین مفتی تقی عثمانی نے سوشل میڈیا پلیٹ فارم ایکس پر اپنے بیان میں کہا کہ ایران اور امریکا کے درمیان کشیدگی کو کم کرنے اور ممکنہ جنگ کے خطرات کو روکنے میں پاکستان کی قیادت ایک نہایت نازک اور متوازن کردار ادا کر رہی ہے۔

انہوں نے کہا کہ آج ہونے والے مذاکرات کی کامیابی سے نہ صرف عالم اسلام بلکہ پوری دنیا کا مفاد وابستہ ہے، اور اس موقع پر وزیر اعظم کی جانب سے عوام سے دعا کی اپیل اس عمل کی حساسیت اور اہمیت کو مزید اجاگر کرتی ہے۔

اسی طرح مفتی منیب الرحمان نے اپنے بیان میں کہا کہ پاکستان کی مسلسل اور شبانہ روز سفارتی کوششوں کے نتیجے میں ایران اور امریکا مذاکرات کی میز پر آئے، جو پاکستان کی خارجہ پالیسی کے لیے ایک اہم پیش رفت ہے۔

انہوں نے کہا کہ اس عمل میں وزیر اعظم شہباز شریف، فیلڈ مارشل عاصم منیر اور وزیر خارجہ اسحاق ڈار کا کردار قابلِ ذکر ہے، جبکہ چین اور سعودی عرب کی پس پردہ سفارتی معاونت بھی اہم رہی ہے۔

مفتی منیب الرحمان کے مطابق یہ مذاکرات پاکستان کے لیے ایک تاریخی سفارتی اعزاز ثابت ہو سکتے ہیں، اور موجودہ حالات میں تحمل، حکمت اور تدبر کے ساتھ مسئلے کے حل کی اشد ضرورت ہے۔ انہوں نے اس امید کا اظہار بھی کیا کہ فریقین کے اعلیٰ سطحی وفود اس موقع کو مثبت سمت دینے میں کامیاب ہوں گے۔

سفارتی و مذہبی حلقوں کے مطابق اس نوعیت کے بیانات نہ صرف مذاکراتی ماحول کی حمایت ظاہر کرتے ہیں بلکہ خطے میں امن و استحکام کے لیے اجتماعی دعا اور امید کے جذبات کو بھی تقویت دیتے ہیں۔