تہران میں معصوم بچیوں کی یاد میں جذباتی مناظر

 

تجریش اسکوائر میں آویزاں تصاویر نے شہریوں کو اشکبار کر دیا

دل دہلا دینے والا خراجِ عقیدت، متاثرہ خاندانوں سے یکجہتی کا اظہار، عالمی سطح پر واقعے پر ایک بار پھر ردعمل کی لہر

بدھ، 15 اپریل 2026
رپورٹ جستجو نیوز

تہران میں ایک انتہائی جذباتی اور علامتی منظر اس وقت دیکھنے میں آیا جب شہر کے معروف تجریش اسکوائر میں مناب اسکول پر حملے میں جاں بحق ہونے والی معصوم بچیوں کی تصاویر آویزاں کی گئیں۔ یہ مناظر دیکھ کر بڑی تعداد میں شہری آبدیدہ ہو گئے اور پورا ماحول سوگوار کیفیت میں ڈوب گیا۔

غیر ملکی میڈیا رپورٹس کے مطابق یہ اقدام متاثرہ خاندانوں سے اظہارِ یکجہتی اور شہداء کو خراجِ عقیدت پیش کرنے کے لیے کیا گیا ہے۔ تصاویر کی تنصیب کے بعد شہریوں کی بڑی تعداد نے موقع پر پہنچ کر گہرے دکھ اور افسوس کا اظہار کیا، جبکہ کئی افراد نے خاموشی سے دعا بھی کی۔

یاد رہے کہ 28 فروری کو ایران کے علاقے مناب میں ایک اسکول پر حملے کے نتیجے میں بڑے پیمانے پر جانی نقصان ہوا تھا، جس میں بچیوں سمیت 160 سے زائد افراد کے شہید ہونے کی اطلاعات سامنے آئی تھیں۔ اس واقعے نے ایران سمیت عالمی سطح پر بھی شدید ردعمل کو جنم دیا تھا اور مختلف حلقوں کی جانب سے اسے ایک بڑا انسانی المیہ قرار دیا گیا۔

دوسری جانب ایرانی پارلیمنٹ کے اسپیکر باقر قالیباف نے بھی اس سانحے کو اجاگر کرنے کے لیے ایک منفرد انداز اپنایا تھا۔ اپنے پاکستان کے دورے کے دوران انہوں نے طیارے میں اپنی نشست پر شہید بچیوں کی تصاویر اور ان کے اسکول بیگز رکھ کر انہیں یاد کیا اور سوشل میڈیا بیان میں کہا تھا کہ یہ میرے احباب ہیں، جس سے انہوں نے متاثرہ بچوں کے ساتھ گہری ہمدردی کا اظہار کیا۔

تہران میں ہونے والی یہ علامتی سرگرمی ایک بار پھر اس سانحے کی یاد تازہ کر گئی ہے اور عوامی سطح پر دکھ اور افسوس کی نئی لہر کو جنم دے رہی ہے۔