آبنائے ہرمز: طاقت، حکمت عملی اور خطے میں مستقبل کی جنگیں

عرض محمد سنجرانی
اتوار 6 اپریل 2026 جستجو نیوز

خطے میں ایران کی جنگ کا انحصار بنیادی طور پر آبنائے ہرمز کے کھلنے یا بند ہونے پر ہے۔ عالمی تجزیہ کاروں کا کہنا ہے کہ امریکی صدر ٹرمپ کا غیر مستحکم رویہ اور حکمت عملی کی کمی خطے میں مزید کشیدگی پیدا کر رہی ہے۔ اگر ٹرمپ نے تاریخی اسباق، جیسے نہر سویز اور گیلی پولی کے تجربات کو مدنظر رکھا ہوتا، تو وہ اس محاذ پر بہتر فیصلے کر سکتے تھے۔

1956ء میں مصر کے صدر جمال عبدالناصر نے نہر سویز کو قومی تحویل میں لے کر عالمی طاقتوں کو جواب دیا۔ ابتدائی فضائی حملوں کے باوجود مصر نے محدود وسائل کے ساتھ جہازوں کو بند کرکے نہر کو بلاک کر دیا، جس سے برطانیہ کو مالی مشکلات کا سامنا کرنا پڑا۔ اسی طرح، ایران نے خلیج فارس میں امریکی تنصیبات اور مال بردار جہازوں کو نشانہ بنا کر آبنائے ہرمز کو مکمل طور پر بند کر دیا، جس سے عالمی تجارت اور فوجی رسد متاثر ہوئی۔

تاریخی حوالوں سے یہ واضح ہوتا ہے کہ آبنائے گزرگاہوں پر طاقت کے زور سے قابو پانا طویل المدتی امن کے لیے خطرناک ہے۔ 1915-16ء میں عثمانی سلطنت نے دارڈانلز کو بند کرکے روس اور اتحادی فوجوں پر اثر ڈالا، جس کے نتیجے میں ہزاروں فوجی ہلاک اور بولشویک انقلاب کے حالات پیدا ہوئے۔ اس سے واضح ہوتا ہے کہ آبنائے ہرمز جیسی اسٹریٹجک گزرگاہوں کی حفاظت صرف فوجی طاقت سے ممکن نہیں، بلکہ اصولوں، معاہدوں اور ثالثوں کی ضمانت کے ساتھ کی جانی چاہیے۔

ماہرین تجزیہ کاروں کے مطابق امریکہ کو چاہیے کہ وہ 1936ء کے منٹریو معاہدے جیسے اصولوں پر مبنی ایک معاہدہ طے کرے، جس میں درج ہو کہ:

· تجارتی جہازوں پر حملہ نہیں ہوگا

· بحری راستوں میں کوئی رکاوٹ یا سرنگ نہیں رکھی جائے گی

· جنگ کے دوران غیر خلیجی ممالک کے جنگی جہازوں پر پابندی ہوگی

· معاہدے کی ضمانت اقوام متحدہ فراہم کرے اور چین، روس، ایران، امریکہ اور یورپی ممالک دستخط کریں

ایران نے اپنے جغرافیائی اور فوجی نظام کو مدنظر رکھتے ہوئے ایک ڈی سینٹرلائزڈ ڈیلیوری سسٹم اپنایا، جس کے ذریعے مرکزی کنٹرول کے بغیر رسد، اسلحہ اور فوجی نقل و حرکت ممکن ہوئی۔ یہ حکمت عملی ویتنام کی جنگ میں ہوچی من ٹریل کی طرح فیصلہ کن اور تاریخی اہمیت کی حامل رہی۔

ماہرین کا کہنا ہے کہ ایران کی طویل المدتی مزاحمت خطے میں فلسطین کی آزادی کے لیے بھی ایک مثال ثابت ہو سکتی ہے، اور دنیا کے دیگر ممالک، جیسے وینزویلا، کیوبا اور لاطینی امریکہ، بھی امریکی تسلط کے خلاف اپنی علاقائی حکمت عملی اختیار کرنے کی تحریک پا سکتے ہیں۔

یہ واضح ہے کہ اگر مسلم ممالک، برکس اور دیگر عالمی طاقتیں مل کر اقتصادی اور دفاعی تعاون کو مضبوط بنائیں، تو خطے میں ایک متوازن طاقت کا نظام قائم ہو سکتا ہے، جو امریکہ کی پیٹرول ڈالر پر مبنی خارجہ پالیسی کے اثرات کو محدود کرے۔ آبنائے ہرمز پر پائیدار معاہدہ نہ صرف تجارتی جہاز رانی کے لیے ضروری ہے بلکہ خطے میں دیرپا امن اور مستحکم تعلقات کے لیے بھی ناگزیر ہے۔

آج کے نازک عالمی موڑ پر یہ بات یقینی ہو گئی ہے کہ ایران محفوظ ہے تو خطہ محفوظ ہے، اور عالمی حکمت عملی کی کامیابی میں پاکستان، ترکی، چین اور دیگر برکس ممالک کی ثالثی اور تعاون کلیدی کردار ادا کرے گا۔